Ath. Þetta er gríðarlöng færsla og ég móðgast ekkert ef þið skoðið bara myndirnar. Það eru samt enginn brjóst þarna Hannes enda er þetta jólafærsla sem predikar friðar- og gleðiboðskap.

Ég byrja á huglægum jólainngangi:

Jólin nálgast óðfluga og öll höfum við okkar hefðir. Þegar ég var lítill man ég eftir því hversu glatt hjarta mitt varð þegar ég fór með mömmu og Herði bróður í Blómaval að sjá jólalandið þar. Ég setti á mig jólasveinahúfuna mína og hrópaði smámæltum rómi: "mamma, mamma. Getum við farið í jólasveinaland". Blómaval var alltaf með metnaðarfullt jólaland. Í dag hefur Blómaval ekki sömu áhrif á mig. Hvort sem jólalandið hefur dalað eða ég hef fullorðnast þá fer þessi barnalegi spenningur innan í manni fyrir jólunum að verða æ sjaldgæfari. Jólin eru samt sem áður alltaf mjög sérstök. Yndislegasti tími ársins. Það er svo gaman að fara í bæinn að versla jólagjafir, labba niður Laugarveginn og skoða jólaljósin og svo síðast en ekki síst... horfa á jólamyndirnar.

Hér kem ég mér að efninu:

Það er til heilmikið af myndum sem eru gerðar í anda jólanna. Margar þessara mynda er hægt að horfa á aftur og aftur. Þá skiptir ekki máli hversu oft þú hefur séð myndina, þegar jólin koma þá horfirðu á sömu myndirnar aftur og aftur, ár eftir ár. Maður er eins og barn sem horfir á sömu spóluna fram og aftur. Öll eigum við okkar uppáhalds jólamyndir. Hér er listi yfir mínar.

Ég var að fá senda einstaklega skemmtilega mynd frá síðasta sumri.. þar sem ég og Buxi vorum að fagna marki á móti Víking Ó. Þetta var á þeim tímapunkti í fyrra þar sem við vorum báðir einstaklega heitir markaskorarar og vermdum að ég held báðir listann yfir topp markaskorara fyrstu deildar. Af þeirri ástæðu vorum við farnir að æfa hin ýmsu fögn og æfðum við þetta daginn fyrir leikinn. Svo heppilega vildi til að við skoruðum báðir og fögnuðum svona:

Ég man eftir því að við pældum í því daginn áður að lokastig fagnsins væri á gráu svæði en þar sem fyrri hluti fagnsins var svona óendanlega svalur ákváðum við að taka "þetta reddast" lausnina á þetta. Eins og þið sjáið þá reddaðist þetta ekki beint enda þætti þetta múf jafnvel vafasamt á Q-bar. Ég hef samt no regrets nema.. ef þið kíkjið á mynd 1, þá sleiki ég ennið á Buxa með hælnum og fékk hann smá skeinu fyrir þær sakir. Núna er einmitt nýtt sumar að hefjast, fyllt fögrum fyrirheitum. Við Buxi fáum þó bara tvö tækifæri í sumar til að endurtaka fagnið þar sem við leituðum báðir á ný mið fyrir komandi sumar.

Annars verður mjög gaman að fylgjast með fótboltanum í sumar.. Ég á náttúrulega blóðbræður í 1.deildinni, hef engar áhyggjur af þeim enda eru þeir með virkilega svalt og gott lið og mun Freysi sýna sína miklu leiðtogahæfileika sem fyrirliði.. reyndar mjög stór spor sem hann fetar þarna en ef einhver getur það þá er það Freyr.. Svo verður líka gaman að sjá ungu strákan stíga upp og taka ábyrgð.. Ég er líka spenntur að sjá Kobbsinator skora jafn grimmt á vellinum og utan hans. Vona líka að Dóri eldri sýni hvað hann getur. Gæti nefnt alla í liðinu en eins og þeir vita allir þá er ég ekki þessi fótboltanarritator. Óska þeim að sjálfsögðu öllum alls hins besta uppfrá. Svo erum við vinirnir að spila með Fram og Víking. Það verður mjög gaman að mæta Hannesi enda er hann óðum að nálgast sitt besta form eftir leiðindar meiðsli á undirbúningstímabilinu. Ég er samt fegin að vera ekki varnarmaður þegar við mætum Val og Keflavík.. það verður samt skemmtilegt að mæta Danna Hjalta og Buxa.. ég er reyndar bara fegin yfir höfuð að vera ekki varnarmaður.

Jæja, gott í bili enda væri ekkert vitlaust að fara læra.

Núna virðist samkundumiðstöðin MySpace vera að gera allt vitlaust í heiminum. Vinsældir síðunnar eru óumdeilanlegar. Nú síðast var ég að horfa á The O.C. þar sem Summer nennti ekki að hanga með Seth því hún ætlaði að vera á MySpace. Einnig man ég eftir að hafa heyrt minnst á síðuna í Entourage (ótrúlega skemmtilegir þættir), Scrubs og fleiri þáttum. Fyrir þá sem eru ekki alveg með á nótunum þegar kemur að myspace þá er þetta netsíða þar sem hver og einn notandi hefur sitt eigið svæði/síðu. Á síðuna setur viðkomandi upplýsingar um áhugamál, uppáhalds myndir, bækur, sjónvarpsþætti, fyrirmyndir o.þ.h. Einnig gefst notendum sá möguleiki að hafa myndir af sér og vinum sínum. Notandi velur útlit síðunnar og getur verið að dúlla sér í hinu og þessu. Það sem er skemmtilegt við síðuna er að notendur adda hvorum öðrum sem vinum og geta í framhaldi af því sent á milli sín myndir, komment og skilaboð. Þetta er einstaklega skemmtilegt t.d. þegar vinahópur ætlar að hittast næstu helgi og vikan er notuð á myspace til að senda á milli gamlar myndir, einkahúmorskomment og fleira í þessum dúr. Möguleikarnir eru fjölmargir.

Það er ein hlið myspace sem mig langar að koma inn á hér í dag. En það er val á myndum sem notendur hafa af sér. Þá er ég sérstaklega að beina orðum mínum til stráka sem eru að nota myspace í hössl-legum tilgangi. Ég hef hugsað þetta MySpace myndamál til þaula og komist að því að hver sá sem ætlar sér stóra hluti á myspace þarf að hafa cirka 8 myndir sem hver og ein sýnir mismunandi hlið á persónuleika og/eða útliti viðkomandi. Til að sýna hvað ég er að fara með þessu mun ég láta fylgja myndir af myspace-um vina minna og kunningja í leyfisleysi.

Eftirtaldar myndir tel ég vera hornsteinn í að ná árangri á myspace:

1.Kynþokkafull mynd
Hér er mynd sem sýnir þig kynþokkafullan. Þetta er samt hættulegur leikur því það er mjög auðvelt að gera þetta hallærislegt. En ef rétt er spilað úr spilunum þá getur þetta verið mikilvægasta myndin, svona myndin sem stelpan sýnir vinkonum sínum. Til þess að þetta lendi ekki vitlausu megin við línuna er gríðarlega mikilvægt að hafa e-ð fyndið komment undir myndinni til að vera ekki alveg sorglegur. Þessi mynd er nauðsynleg til að stúlkan viti að þú ert heitur gaur og finni líkama sinn vilja þig.

Hér má sjá gott dæmi um kynþokkafulla mynd. Það sem bjargar henni frá því að vera hallærisleg er lúmskt glott á vörum og andliti fyrirsætunnar og sú staðreynd að viðkomandi er meðalmanninum nokkrum stöðlum fremri.

2.Flippuð mynd
Sýnir að þú sért ekki bara fallegur líkami heldur líka uppátækjasamur. Þessi mynd segir henni: “ef þú hengur með mér þá get ég tryggt að þú skemmtir þér”. Hugmyndir um mynd af þessu tagi eru myndir af þér í grímubúning, með einhverju dýri, fyndin nektarmynd eða hangandi í ljósastaur.. áhorfandi á að hugsa með sér “hvað í ósköpunum er í gangi á þessari mynd” eða “vá hvað það er örugglega góð saga á bakvið þessa mynd”.

ég held ég geti með sönnu sagt að þú finnur ekki betur heppnaða mynd til að fylla flipp-kvótann á myspace. Það er svo skemmtilegt hvernig hann nær að láta þetta líta út eins og þetta sé bara eðlilegur hluti af hans daglega lífi. Þessi mynd er líka sniðug þar sem hún sýnir að hann er massaður gaur.

Hér má sjá Þrumarann taka eina af sínu frægu grettum. Þessi mynd er gott dæmi um flippmynd á myspace. Hún segir stelpunum: "þú munt hlæja með mér". En svo er hann náttúrulega með myndir líka sem segja að þið munið gera annað en að hlæja bara.. sem sagt með réttri samsetningu mynda segir þú að þú sért skemmtilegur en samt engin trúður.

3.Sæt/falleg mynd
Þessi mynd er ekki sexý en sýnir samt að þú getur verið sykursætur og um leið gefurðu þá frá þér þá strauma að þú sért góður og jafnvel barngóður.

Klassísk pretty-boy mynd. Viðfang er í action en gefur sér samt tíma til að daðra við vélina.

Önnur classic pretty-boy. Viðkomandi er í partý-i, og sýnir hér með að svona lítur hann út í daglega lífinu. "Ég get hitt þig hvenær sem er og alltaf litið vel út" er hann að segja með þessari mynd.

Annað gott dæmi um mann sem hefur ekkert að fela.

4.Ferða/ævintýramynd
Þessi mynd er frekar crusial þar sem hún sýnir að þú ert ekki þessi döll endurskoðanda týpa. Þú ert ekki hræddur við að synda á móti straumnum og gera eitthvað óvenjulegt. Það að hafa ferðast mikið bætir líka svona mistery kryddi í pottinn. Það er alltaf smá óvissa í huga stúlkunnar.. átti hann sjóðheitt ástarævintýri með einhverri latino senjorita. Það gerir hana smá óörugga sem gefur þér þ.a.l. svona 10% forgjöf í hand.

Klassísk ferðamynd þar sem aðili er að prófa framandi hluti með útlendingum.

Frábær ævintýramynd. Þessi mynd hrópar á góða sögu. "já ég get sko sagt þér góða sögu frá þessari mynd vænan".. Copyright á línu: Hannes

5.Vinamynd
Það er mikilvægt að hafa líka mynd(ir) af vinum þínum. Þessi mynd þjónar tvíþættum tilgangi. Númer eitt: sýnir að þú átt vini og ert ekki bældur, vinalaus auli. Það er mikilvægt fyrir stúlkur að karlmaðurinn hafi sterka félagslega stöðu því allar vilja þær alphamale. Og seinni tilgangurinn með vinamyndinni er að sýna að þú ert ekki algjört egó sem er bara með myndir af sjálfum þér á myspace-inu.

Klassísk vinamynd.. kannski helst til of margir þannig að að maður gæti bara verið hluti af hópi en ekki í raun átt sanna vini. En þessi sleppur samt alveg rúmlega sem vinamynd.

Þetta er alveg klassísk vinamynd. Fámennur hópur vina sem er að taka létt flipp. Þessir strákar eru augljóslega ekki vinalausir aular heldur alphamale

 

6.Artý-mynd
Þessi mynd er ekki nauðsynleg en hún hjálpar samt mikið til. Það að sýna fram á að þú hafir listhneigða hlið opnar fyrir þér alveg nýjan vettvang. Þetta er vettvangur þar sem hnakkinn eða íþróttatjokkóinn á ekki séns. Bættu við einni eða tveimur photoshopmyndum og þá eru þér allir vegir færir. Það þarf samt að passa að sýna ekki artýlistarembing í þessari mynd og hafa hana nær húmornum frekar en ekki nema þú sért einstaklega hæfileikaríkur á þessu sviði.

Þetta er fínt dæmi um semí artý mynd. Þetta er greinilega gaur sem er ágætis týpa og gjaldgengur á alla vettvanga sem hann girnist.

Artý mynd með húmor..

7.Gömul mynd
Nú er vinsælt að hafa gamlar skannaðar myndir á myspeisinu. Fyrir utan að það er ótrúlega skemmtilegt að skoða þessar myndir þá sé ég einn hugsanlegan hössl tilgang með þeim. En það er að hafa mjög sætar barnamyndir af þér og senda þá frá sér skilaboðin: góð gen= góður til undaneldis= vertu með mér og þú eignast falleg börn. Soldið vafasamt en hey come on, getur ekki skaðað. Ágætlega mikilvæg mynd en ekki nauðsynleg.

Hér má sjá vel heppnaða gamla mynd.

Klassíks gömul skönnuð mynd sem uppfyllir öll skilyrðin.

Hér höfum við þessa klassísku dúllumynd. Barnið er mikil dúlla á myndinni og svo eru byssur á myndinni sem geta verið tilefni til skemmtilegra umræðna og viðkomandi getur jafnvel sagt sögur þegar hann fékk að prófa byssu fyrst og svona. Ógrynni af efni og afþreygingu í þessari mynd.

8.Semí-ljót mynd
Þessi mynd á ekki að vera beint ljót af þér en samt áttu ekki að vera upp á þitt besta. Með þessari mynd sýnir þú að þú ert ekki að pæla of mikið í útlitinu og ert alveg sama þó þú sért ekki alltaf upp á þitt besta. Þetta er frekar mikilvæg mynd.

Þessi maður er greinilega mjög öruggur með sjálfan sig þar sem hann hefur sjálfstraust í að sýna sig æla. Ég mæli ekki með þessu nema fyrir lengra komna. En þessi mynd vekur hlátur og sýnir að hann pælir ekki of mikið í útlitinu.

Það er líka sígilt að hafa mynd þar sem maður er að borða sem semí-ljóta mynd. Grettumynd ætti líka vel við hér.

 

Eins og gefur að skilja þá eru fáir sem eru sterkir á öllum þessum sviðum. Þess vegna er mikilvægt fyrir alla sem lesa þetta að taka sér nokkar mínútur í hugleiðslu (ekki kukl hugleiðslu heldur bara staldra við og hugsa) og reyna átta sig á því að hver þeirra sterka hlið sé. Þeir sem eru hafa ferðast mikið og eru ófríðir hafa þá heldur nokkrar ferðamyndir af sér í staðin fyrir kynþokkafullar myndir. En það þarf samt að passa að hafa ekki bara ferðamyndir, eða bara vinamyndir eða bara artý-myndir. Lykillinn er að finna hina fullkomnu samsetningu af öllum þessu hlutum. Þetta hér að ofan er bara uppskrift, þið verðið að finna þau hlutföll sem henta ykkur.

Í lokin vil ég koma því á framfæri að þessi grein er skrifuð með Seinfeld sem fyrirmynd og skal ekki taka 100% alvarlega. Hún er skrifuð sem vitundarvakning þar sem boðskapurinn er: ekki gera neitt í hugsunarleysi.

Lifið vel og blómstrið,

Pétur Svans

Þegar ég velti því fyrir mér hver bestu atriði kvikmyndasögunnar eru koma strax nokkur atriði upp í hugann. Þetta eru atriði á borð við “Luke, I am your father” úr Star Wars, Forrest Gump með sína rómuðu konfektkassalíkingu, hin eitursvala ræða Samuel L. Jacksons sem inniheldur hin (já já ég þéra þetta hiklaust) ódauðlegu orð: “And you will know my name is the Lord when I lay my vengeance upon thee”. Einnig er skylda að nefna þegar Sharon Stone hagræddi fótstöðu sinni í yfirheyrslu í myndinni Basic Instinct, hesthausinn í The Godfather, ybbi-kayjei motherfucker eða atriðið þar sem Kate og Leo sigruðu heiminn í stafni Titanic. Þetta eru allt atriði sem fyrir löngu eru búinn að festa sig í sessi sem stærstu atriði sögunnar.

Mig langar aftur á móti að gera lista yfir þau atriði kvikmyndasögunnar sem mér finnst einna skemmtilegust, jafnvel nettust og hafa snert sérstaklega við mér. Sum þessara atriða eru kannski ekki viðurkennd í heimi kvikmyndanna en þið þekkið eflaust tilfinninguna sem þið fáið þegar þið sjáið eitthvað sem ykkur finnst virkilega geðveikt.. maður verður þvílíkt glaður yfir því að einhverjum skuli hafa getað dottið þetta í hug og að maður sé að upplifa þetta en hamingjutilfinningin er blönduð dashi af angist. Angist yfir því að þetta er bara kvikmynd og manns eigið líf verður aldrei jafn áþreyfanlegt. Þó getur manns eigið líf vissulega verið mjög merkilegt en það verður aldrei bíómynd. Í bíómyndum er þessi tónlist og stemming sem virkilega kallar fram hlátur, gæsahúð, tárin.. á meðan lífið.. já lífið bara gerist. Allavega.. þá eru þetta atriði sem mér finnst frábær og eru uppáhalds atriði mín í kvikmyndasögunni.. allavega þeirri kvikmyndasögu sem lífsleið mín hefur spannað. Flest þessara atriða kannast allir við en svo eru að sjálfsögðu eitt tvö vafasöm. Ok helling af orðum komið í innganginn en fæst þeirra merkja eitthvað af viti.. En þegar ég fjalla um næstu atriðin þá nenni ég ekki hafa alltaf eitthvað “váááá hvað þetta er geðveikt atriði”.. ég stilli sem sagt tilfinningunum í hóf þegar ég lýsi þeim en staðreyndin að þau séu á listanum talar sínu máli.

Dömur mínar og herrar.. án frekar málalenginga aka without further ado.. þá kynni ég stoltur topp 10 lista yfir nettustu atriði kvikmyndasögunnar:

10. Shawshank Redemption- Þegar fangelsisstjórinn kastar taflmanni í gegnum veggspjaldið.

9. Love Actually- Ástarjátning á spjöldum.
Þetta atriði bræðir hörðustu menn... jafnvel handrukkara og morðingja. Það sem mér finnst gefa þessu atriði svona aukið flava er útsjónarsemin hjá gaurnum með spjöldin: “segðu að þetta séu jólasöngvasöngvarar”.. flott hvernig hann sá fyrir öllu. Minnti mig á útsjónarsemi Seinfeld þáttanna.

8. The Mask- þegar Cameron Diaz gengur inn á bankann.
Hver man ekki eftir stundinni þegar Cameron Diaz kom inn í líf okkar klædd rauðum veðurbörnum kjól. Ég man það eins og það hefði gerst í gær. Árið var 1994 og ég var 10 ára gutti að verða var við hvolpavitið. Ég held svona grínlaust að þetta atriðið hafi kickstartað hvolpavitinu upp á næsta stig. Ekkert meira um þetta að segja.

7. Vegur- Þar sem Rúnar er dauður í speglinum
Hið magnaða meistaraverk Hannesar Þórs Halldórssonar, Vegur er ástæðan fyrir því að ég sef ennþá með ljósin kveikt og fer ekki óvopnaður út á þjóvegi landsins. Atriðið þegar bílstjóri bílsins lítur í bakspegilinn og sér Rúnar hræðilega útleikinn í aftursæti er um eilífð grafið í minni mér. Úff get ekki talað meira um þetta.

6. The Girl Next Door- Hetjukossinn í partýinu.
Áður en ég byrja þá geri ég mér grein fyrir þeim gagnrýnisröddum sem koma upp við að hafa girl next door á listanum. En við ykkur hef ég eitt að segja: stingið þið því þar sem sólin ekki skín.. já ég er bad-ass en hef mjúka hlið. Málið er að Girl Next Door er ein besta mynd sem ég hef séð og ég hef kvikmyndamógúl til að bakka mig upp (GSM:8234804). En atriðið þar sem hann er búinn að vera hanga lengi með þarna gellunni í næsta húsi og fer svo með hana í partý þar sem vinsælu strákarnir í skólanum fara að reyna við hana og reka hann út úr partýinu. Hugrekkið sem hann sýnir þá er mér fyrirmynd á hverjum degi. Hann gengur á milli hennar og einhvers gaurs og kyssar hana djúpum kossi.. myndavél hringsólar.. this years love með David Gray ómar í eyrum líkt og fyrir töfra.. gæsahúð myndast á húð áhorfandans. Þetta er svona atriði sem gerist ekki í daglega lífinu.. allavega ekki með tónlistinni og hringsólinu sem gefur þessu aukin kraft. Jæja 6.sætið smá hýrt en það hefur aldrei drepið neinn.

ATH. SMÁ SPOILER.
5. Hot Fuzz- Feiti skýtur upp í loftið.
Þar sem Hot-Fuzz er glæný ætla ég ekki að tala nánar um þetta. En þeir sem hafa séð myndina vita alveg hvað ég er að tala um. Það var annað hvort þetta atriði eða þegar hann sparkar í hausinn á gömlu konunni. Ég varð strax hughrifinn af þessu atriði og vissi um leið að það myndi kveikja bros eða allavega glott næstu árin þegar ég hugsa til þess. Líklega topp 3 fyndnasta sem ég hef séð í bíómynd (hin atriðin eru í 2.sæti hér á þessum lista og svo geymdi ég eitt sæti fyrir eitthvað sem ég er að gleyma.)

4. Starsky and Hutch- byrjunaratriðið þar sem þeir eru að kynna sig.
Starsky and Hutch er uppáhaldsmyndin mín og þetta byrjunaratriði hefur einna mest um það að segja. Þegar þeir eru að kynna sig og Ben Stiller í hlutverki Starsky segir: in Bay-City the rule is, you cross the line-your nuts are mine.. þá veit maður að þetta er ekki færibandamynd. Allt við þetta atriði er magnað. Nenni ekki að fara nánar í það.

3. Almost Famous- Tiny Dancer rútuatriðið.
Þetta er líklega besta feel-good atriði sem ég hef séð. Stemmingin sem myndast við að horfa á það er einstök. Bros er óhjákvæmilegt og ósjálfrátt fyllist maður gleði. Lagið Tiny Dancer gerir þetta atriði ódauðlegt.

2. Around the world in 80 days- gamla konan skellur á andlitið.
Þetta atriði er smá svona kult hjá mér og þríeykinu. Ég sá þetta atriði fyrir svona þremur árum og vissi um leið að þetta væri það fyndnasta sem ég hafði séð og mun líklega nokkurn tímann sjá. Það er líka mjög þægilegt að vita hvað er það fyndnasta sem ég hef séð. Þetta atriði er allavega í Jackie Chan myndinni Around the World in 80 Days og felur í sér gamla konu sem dettur beint á andlitið.. þetta er sko ekki bara að detta á andlitið heldur ÞRUSAST hún beint á andlitið. Það er frekar erfitt að lýsa þessu en ef þú hefur séð það þá veistu hvað ég er að tala um. Ég reyndi að finna brot af þessu á netinu en það gekk ekki. En ef það er einhver þarna úti sem deilir þessar ást með mér þá bið ég endilega að kommenta hér að neðan.

1. Napoleon Dynamite- Dansatriðið
Ég get með fullkomnlega hreinni samvisku sett þetta atriði í fyrsta sæti hérna. Þetta dansatriði er ástæðan fyrir því að ég ákvað að gera þennan lista. Ég ætla rétt að vona að þetta atriði þurfi vart að kynna fyrir nokkrum manni. Hér dansar Napoleon Dynamite við lag Jamiroquai, Canned Heat, á hreint ótrúlega svalan hátt. Málið er að hann er alveg fáranlega mikill lúði alla myndina, á ekki marga vini í skólanum, skíttapaði í genalottóinu og hefur nánast ekkert “going for him”. EN í cirka 2-3 mínútur í myndinni þá sér maður nýja hlið á þessum lúða.. Moon-bootsin hans verða cool, hárið á honum eftirsóknarvert og danssporin hans nýtt lífsmarkmið. Tjékk it.

Þetta voru ekki fyrstu 10 atriðin sem mér datt í hug. Það voru nokkur sem voru við það að detta inn á listann.

Þau atriði sem gerðu tilkall:

-Shawn of the dead, þegar þeir eru að slást við uppvakninga og ætla að henda í þá plötum. En þá fara þeir að flokka það hvaða plötum þeir ætla að henda.

-American History X, þegar hann stappar á manni á kantsbrún.

-School of rock, atriðið á tónleikunum.

-Fightclub, þegar Brad Pitt segir frá þegar maður bíður annað hvort klofið eða rassinn í þröngum rýmum, eftir því hvort maður vilji viðkomandi eða ekki.

-Borat, þegar hann slæst við fatty-ið.

-Anchorman, þegar hann er að vinna í byssunum og byrjar að telja í 1000 þegar gellan kemur inn.

Þá er þetta orðið ágætt.. Bíst alveg við kommentum á borð við: heyyy þú gleymdir þessu atriði. Ég segi nei við því.. þessi listi er fullgerður og verður ekki haggað.

Farinn til Portúgal í fótbolta og sólbað,

Pétur Örn Svansson

P.S. lifi feminisminn.

Afdrifarík helgi að baki og kaldur en um leið blíður mánudagur tekur við mér.

Eins og glöggir lesendur mínir hafa vafalítið, jafnvel vafalaust tekið eftir þá leita ég oft í hlýjan og elskandi faðm sjónvarpsins. Hvort sem ég sækist eftir gleði, frið, von eða bara good old entertainment, þá hefur sjónvarpið alltaf upp á eitthvað að bjóða. Það er einn hins vegar einn póll sem er til þess fallinn að taka stað sjónvarpsins. Þessi póll hefur upp á ótal margt að bjóða sem stenst sjónvarpinu auðveldlega snúninginn. Vissir þættir þessa póls eru sjónvarpinu meira að segja það mikið fremri að hann lætur sjónvarpið líta út eins og hárið á Donald Trump samanborið við hárið á MIKA (vafalust vafasöm líking). Þessi umræddi póll er náttúran okkar, sameign okkar allra. Um helgina fékk valin hópur heppinna jarðarbúa að sjá tunglmyrkva. Að sjálfsögðu vorum við Íslendingar á meðal þeirra útvöldu enda höfum við aldeilis unnið í fæðingarlottó-inu. En helgin var merkileg fyrir fleirra en að fulltrúar þjóðhátíðarstemmingar fengu ekki að tjalda í Smáralindinni vegna eldhættu. Ójá, um helgina var líka tunglmyrkvi.

Tunglmyrkvi er eitt það fallegasta sem móðir náttúra hefur upp á að bjóða.  Þegar eyru mín heyrðu að um helgina yrði tunglmyrkvi þá gladdist hjarta mitt ógurlega. Hendur mínar, í samstarfi við augu mín, fundu til myndavél og allur líkaminn var snögglega hulinn hlýjum en um leið smart fötum. Þessi stund var yndisleg í alla staði og mun hún vera grædd í minnisrásum heila míns svo lengi sem hjartað slær. Mig langar að deila þessari stund með ykkur, svo yndisleg var hún. Til þess að gera mér það kleyft tók ég 756 myndir frá tunglmyrkvanum. Eftir að hafa rennt yfir þær allar svona tvisvar þá valdi ég út fjórar flottustu myndirnar. Það var samt mjög erfitt að gera upp á milli þeirra.

Svona lítur tunglmyrkvi út.

Þetta var klárlega hápunktur kvöldsins.

Þessi er mín uppáhalds.

Þessi ekki alveg jafn flott en ég varð bara að láta hana fylgja.

Svona í lokin á þessari færslu þá vil ég bara þakka nokkrum aðilum fyrir eitt allra besta laugardagskvöld sem ég hef upplifað. Þið vitið hverjir þið eruð en í anda Circle of Trust þá fáið þið ekki lengri þakkir hér.

 
Good to be back,

PÖS

Ég var að fletta í gegnum síðuna hjá tónlistar-og fótboltamanninum Danna Hjalta og rakst þá á stórmerkilegar myndir. Það mætti jafnvel segja að þessar myndir séu eins merkilegar og þær verða. Á þessum myndum má sjá Atla Eðvalds, sem óþarft er að kynna, “djókboxa” við Muhamed Ali. Hér sérðu eina þessara mynda:

Ég var yfir mig hissa og um leið heillaður yfir þessum ljósmyndum og velti því fyrir mér hvort það væri möguleiki að láta taka svalari og merkilegri mynd af sér ásamt einhverjum X aðila. Ég komst að þeirri niðurstöðu að eflaust væri ekki hægt að láta taka af sér svalari mynd en Atli gerði um tíðina en það væru samt eflaust nokkrar sem kæmust ansi nálægt því.

Af þessu tilefni setti ég saman topp 10 lista yfir merkilegustu og svölustu myndir sem ég gæti hugsað mér að láta taka af mér.

10. Pósa með öðrum leikara Brokeback Mountain í kúrekafötum

9. Láta Zidane skalla mig í bringuna

8. Vera í marki þegar Maradona skorar með hendi Guðs

7. Láta Jordan troða yfir mig

6. Taka létta æfingu með Bruce Lee

5. Berjast fyrir friði með John Lennon

4. Kíkja undir pilsið hjá Marilyn Monroe

3. Sitja með Rosu Parks í strætó

2. Fá mér vindil í góðra vina hóp með Fidel Castro

1. Tefla í alvörunni við páfann

Gleðilegt ár..

Pétur Örn Svans.

Í próflestri mínum er ég alltaf að læra eitthvað nýtt. Núna eru flestir í mínu umhverfi líka í prófum og er rútínan hjá öllum mjög svipuð. Fólk situr fyrir framan tölvuna að skoða glærur úr tímum og glósur frá einhverjum samviskusömum. Þessi rútína gefur mér samt tækifæri til að kynnast hliðum á vinum mínum sem ég vissi ekki um. Á meðan vinir mínir sitja í sakleysi sínu með i-tunes í gangi og eru "busy" á msn er ég að fylgjast með þeim. Það er nefnilega hægt að komast að mörgu skemmtilegu með tækninni í dag, þ.á.m. hvaða tónlist verður fyrir valinu á meðan legið er yfir bókunum, það stendur nefnilega undir nafninu hjá þeim á MSN. Tveir vinir mínir hafa sýnt á sér ansi skrautlega hlið síðustu daga og fann ég mig bara knúinn til að deila henni með ykkur. Eftirfarandi lög hafa komið reglulega upp hjá viðkomandi einstaklingum.

Hannes Þór Halldórsson:

• Barbie Girl- Aqua
• Hvað hef ég að tapa- Igor
• My heart will go on- Celine Dion
• I´m too sexy- Right said Fred
  (er hann bara að hlusta og hugsa með sér "já ég alveg sexy gaur)
• I wanna sex you up- Color me bad
• She bangs- Ricky Martin
• Waterloo- ABBA

Kjartan Örn Þórðarson

• Förum alla leið- Snooze
• Will 2K- Will Smith
• Irreplaceable- Beyonce Knowles
  (get reyndar ekki böggað þig á því en gaman að finna B-brotha)
• From a distance- Bette Midler
• Invisible- Clay Aiken
• When two become one- Spice girls
• One day in your life- Anastacia

Já misjafn er smekkur manna. Ekki samt koma með eitthvað skítabögg um að ég hlusti á glataða tónlist. Það vita allir að tónlistarsmekkur minn er ekki töff.

Ég var samt að komast að einu öðru í próflestrinum en það er að stelpur gera númer 2. Ég hef lengi lifað í afneitun en komst ekki hjá því að viðurkenna þessa staðreynd þegar ég fékk borð fyrir utan klósettið í Odda. Allan daginn var stöðug ásókn kvenna í þá aðstöðu sem salernið hafði upp á að bjóða og mark my word.. margar þeirra voru ekki bara að púðra á sér nefið.

Svona þegar prófin eru alveg að fara með ykkur þá skuluð þið hafa eitt í huga.. aðstæður gætu verið mun verri.

hægra megin á myndinni

þið gætuð litið svona út

Og svo í lokin set ég myndasyrpu af þrautseygnum snigli. Það var eitthvað sem heillaði mig

Gangi ykkur vel

Allt í lagi, nú er kominn tími á status check varðandi sjónvarpsþætti og download. Það sem er nefnilega svo gott við prófin er að nú eyði ég miklum tíma á Þjóðarbókhlöðunni a.k.a. Hlöbbanum a.k.a. Hlöddaranum. Þar er alveg einstaklega gott að downloada. Ég kveiki bara á tölvunni og set download í gang og dembi mér svo í bækurnar. Gulli Axel vinur minn í Sálfræðinni eða Gulli-Glósa eins og ég kýs að kalla hann gerir mér lífið reyndar aðeins auðveldara með því að gefa mér the gift of time. Hann er alveg einstaklega vel búinn glósum, ergo minni tími í lesturinn, ergo meiri tími í að fylgjast með því heitasta í þáttamenningunni.

Þessa dagana er ég aðallega að horfa á þrjá þætti. Þessir þættir eru:

Scrubs
Fyrir ykkur sem hafið ekki nú þegar sökkt ykkur í þennan brunn hamingju, gleði, húmors, lífsinnsæis og skemmtunar þá eigið þið fram undan gott jólafrí. Hér áður hafði ég dottið inn í einn og einn þátt og fundist bara hin fínasta skemmtun, en þeir snertu mig ekkert meira en það. Ég held að margir þarna úti séu með þetta viðhorf. Málið er samt að þættirnir eru svo miklu miklu meira. Hingað til hafa verið þrír þættir sem eru óumdeilanlega bestu gamanþættir okkar tíma (þá eru ekki meðtaldir einhverjir gamlir breskir gullmolar) . Það hafa verið The Office, Seinfeld og Arrested Development. Þessir þrír hafa borið höfuð og herðar yfir aðra þætti. Ég vil meina að Scrubs brjóti þessa þrenningu og geri með þessum þremur ferningu. Hann nær að skipa sér sess með þeim allra bestu.

Það sem ég hef fyrir mér í þessu er eftirfarandi. Ég tel Scrubs með Zach Braff í fararbroddi, hafa náð að sameina þá tvo eiginleika sem virðast skipta gamanþáttum í tvennt. Þessir eiginleikar eru:

1. Létt “heilalaust” flæði. Þetta er einkennandi fyrir þætti sem getur verið mjög gaman að horfa á, þeir skilja lítið eftir sig en maður hlær oft mikið og þarf ekki að vera að hugsa mikið. Oft mikið um slapstick. Það er hægt að horfa á þessa þætti undir öllum kringumstæðum: á meðan maður tekur til, sofna yfir eða bara til skemmtunar. Friends, King of Queens o. þ.h. eru dæmi um þætti sem einkennast af þessu.

2. Djúpur og greindur húmor með innsýn inn í mannlegt eðli og kringumstæður sem við öll lendum í. Þetta er einkennandi fyrir þætti sem að fólk horfir á og hugsar með sér “vá hvað þetta eru miklir snilldar þættir”. Þættir í þessum flokki einkennast af einstakri innsýn handritshöfunda inn í mannlegt eðli. Oft á tíðum koma kringumstæður sem maður sjálfur kannast við úr sínu daglega lífi og viðbrögð persóna í þáttunum oft svipuð og manns eigin yrðu eflaust. Þessir þættir verða oft ekki vinsælir strax. Dæmi um það eru Seinfeld og The Office. Fyrst voru þeir ekkert rosalega vinsælir, í kringum þá myndaðist hálfgert kult sem smitaði svo út frá sér, en nú eru þeir með vinsælli þáttum.

En það sem Scrubs hefur fram yfir aðra þætti er að þeir lenda þarna á milli þessara flokka. Scrubs eru mjög þægilegir í áhorfi. Þeir renna ljúflega í gegn með góðu flæði. Þrátt fyrir það hafa þeir þessa greind sem gefa þáttum svona edge yfir aðra þætti. Það sem er líka svo flott við Scrubs að það eru margar einstaklega vel heppnaðar persónur sem allar eru óborganlegar. Áhorfandinn fær líka að kynnast þeim mjög vel og því er allavega ein þeirra sem maður getur samsvarað sér með og í raun haldið með.

Ég nenni ekki að tala meira um Scrubs en mark my word, þeir eru þess virði að sökkva sér í frá byrjun. Ég er með fyrstu 5 seríurnar á tölvunni minni ef þið viljið ganga í klúbbinn.

Heroes
Eins og flestir sem fylgjast eitthvað með þá er ég á kafi í þáttum sem heita Heroes. Þetta eru nýir þættir og eru bara komnir 10 þættir út en það bætist einn við í hverri viku. Þetta eru þættir þar sem fylgst er með fólki úr mismunandi áttum sem er að átta sig á að það er með einhvers konar ofurkrafta. Kraftarnir eru mismunandi eftir fólkinu en t.d. má nefna hæfileikann til að fljúga, tímaflakk, græða sár, mála framtíðina o. fl. Við fáum að kynnast fólkinu takast á við þessar breytingar og það í sjálfu sér er mjög spennandi og töff. Öll eiga þau líka eigin baksögu sem við kynnumst. Undirliggjandi söguþráður er svo heimsendir sem felst í sprengju í New York. Sögur einstaklinganna eiga svo eflaust eftir að fléttast saman í þeirri von að bjarga heiminum. Þetta er magnaður þáttur og ekki beint svona Prison Break slash 24 spenna heldur er maður meira forvitinn að vita hvað gerist næst, hvernig kraftarnir þróast og hvernig sögur þeirra tengjast. Þættirnir eru allavega búnir að vera mjög góðir hingað til. En ég man nú þegar fólk hélt ekki vatni yfir Lost hér fyrir stuttu. VONBRIGÐI. Ég vona samt að það gerist ekki með Heroes.

Prison Break, sería 2
Sería 1 af Prison Break var ekkert smá góð. Seinni serían fylgir hinni fyrri ekki alveg nógu vel eftir. Hún er samt fín. Ég horfi á hana því ég er búinn að kynnast persónunum ágætlega og vill sjá hvernig fer fyrir þeim, svolítið þessi tilfinning að forvitnast hvernig gengur hjá gömlum vinum.

Þá er þetta komið gott í bili enda nóg framundan. Prófin byrja núna 2. des og standa til 19. des. Eftir það býst ég við að refsa nokkrum spýtum í byggingarvinnu hjá manninum sem setur Bjarna í Stebba Bjarna. Með þessu mun ég náttúrulega refsa lóðunum miskunnarlaust ásamt því að spila bolta.

I´m out

Kennarinn: jæja eru einhverjar spurningar úr sal varðandi lokaprófið í Tölfræði?

Nemandi: Heyrðu varðandi krossana.. Kemur bara spurning og svo nokkrir mismunandi valmöguleikar?

Kennarinn: uuuuu já. Bjóstu við einhverju öðru.

Stelpunni til varnar þá var hún að hugsa eitthvað dýpra held ég því hún roðnaði ekkert smá þegar hún fattaði hvað hún hafði sagt.

Einn bugaður maður

Gunni: Já er þetta Aron (yfirmaður flutningamála hjá Eimskip).

Aron: Sá er maðurinn. Hvað segirðu Gunni?

Gunni: bara allt fínt þannig séð. Hvað með þig.. ertu ekki hress?

Aron: Jú, jú bara góður. Er ekki allt í hers höndum niðri á höfn?

Gunni: Uuu varðandi það. Það kom svolítið upp á með bílasendinguna.

Það eru mikið af fólki þarna úti sem þarf virkilega að taka sig saman í andlitinu og hugsa áður en það talar. Í þeim fáu tilfellum sem mér finnst ég vera virkilega svalari en annað fólk er þegar fólk segir eitthvað fáranlega asnalegt og er alveg að meina það. Ég segi oft asnalega hluti en innan í mér er ég samt hlæjandi yfir því hvað það er asnalegt og óviðeigandi og kemst stundum að þeirri niðurstöðu að hlutirnir eru eiginlega of asnalegir og þar um leið of fyndnir til að sleppa því að segja þá, þrátt fyrir þá hnekki sem mannorð mitt hlýtur. Mér finnst það sleppa að segja eitthvað asnalegt ef viss meðvitund um ónettleika sé til staðar.

Sem dæmi um það þá var ég með fyrirlestur uppi í Háskóla í fyrradag þar sem ég fjallaði um áhrif neyslusamfélagsins á líkamsímynd. Stór og fancy titill og svona. En þá datt mér í hug hversu fyndið það væri að byrja fyrirlesturinn á að biðja áhorfendur um að velta einni spurningu fyrir sér. Spurningin var sú klassíska “hefurðu heyrt um minnkabúið sem minnkaði og minnkaði og minnkaði og var svo bara búið”? Hún kom efninu að sjálfsögðu ekkert við en ég hugsaði bara með mér, hversu oft hefur maður tækifæri til að vera með fyrirlestur upp í Háskólanum og fannst þetta of gott tækifæri til að sleppa því. Brandarinn féll misjafnlega í mannfjöldann sem skipti ekki máli því innan í mér hafði ég frið.

En ástæðan fyrir færslunni er þríþætt.

Atburður 1
Ég var í tíma í skólanum á miðvikudaginn þar sem var verið að fjalla um hinn eilífa Sigmund Freud. Fyrir framan mig sat glæsileg kona sem hefur verið cirka 27 ára (en seinna kom í ljós að hún var svona 8 ára innan í sér). Kennarinn var að tala um Ödipusarduld, (ath. Það er óþarfi að lesa það sem er skáletrað, það er skýring á Ödipusarduld sem tengist sögunni en er ekki nauðsynleg fyrir áframhaldandi framvindu sögunnar en ég hafði hana samt með ef einhver hefur áhuga) sem felst í því (í stuttu máli) að um 3-4 ára aldur verða strákar uppteknir af typpinu á sér og fá kynferðislegan áhuga á móður sinni. En vandinn er að pabbinn stendur í vegi fyrir aðgangi að móður sinni. Strákurinn verður fljótlega hræddur um að pabbinn viti þetta og verður hræddur um refsingu (þá geldingu). Þessu pælir strákurinn í og fram kemur frávarp: ég hata pabba verður pabbi hatar mig. Þetta veldur miklum kvíða. Strákurinn ákveður því að verða alveg eins og pabbi, verða stór og fá sér konu.  Svo kemur tími friðar þar sem strákar leika sér með strákum og stelpur með stelpum. Þangað til við kynþroska. Þá kemur í ljós hversu mikil vandræðin verða. Með þessu útskýrði Freud eitthvað af sálsýki. En nóg um það.
Í tilfelli stelpna kallast þetta Electruduld eða typpaöfund: Það er mjög svipað og hjá strákunum áðan nema þær verða hrifnar af pabbanum vegna typpaöfundar. Snúa sér að pabba í von um að hann geti skaffað sér staðgengils reðurs í formi barns. Sem sagt stelpur á þessum aldri öfunda pabba sinn fyrir að vera með typpi.
Þá heyrist í konunni fyrir framan mig segja, og hafið í huga að þetta er fyrir framan fullan sal af fólki í háskólabíó, ég er ekkert að tala um í góðra vina hópi. Hún segir þá: “það er líka miklu betra að vera með svona innbyggt verkfæri, ekki þessi typpi hangandi utan á manni” og hlær svo upphátt af sjálfri sér. Ég bara no she didn´t. Sagði hún þetta í alvörunni. Yes she did. Þarna var mér ekki beint misboðið en samt veeel hneykslaður. Kennarinn brosti bara kurteisislega annað en ég sem hefði rekið hana út úr tíma og fellt hana í áfanganum.

Atburður 2 (í beinu framhaldi af atburði 1)
Svo hélt kennarinn áfram og fór að tala um drauma og að ef konur dreymir að vera á hestbaki eða vindla þá eru það duldar langanir í kynlíf. Nema hvað, bætir kennarinn við, ef manni dreymir vindil þá getur það líka bara verið vindill. En þá heyrist í “vinkonu” okkar segja mjög hátt “ekki ef mann dreymir vindil og Bill Clinton” og svo skellihló. Svo hló meira að segja eitthvað fólk. Á þessum tímapunkti var mér stórlega misboðið og hugsaði með mér: “ekki er  fólk svona heimskt, engin af mínum vinum myndi láta þetta út úr sér”. Í framhaldi af þessari hugsun minni lokaði ég fartölvunni minni og gekk út úr tímanum. Það er bara sumt sem ég læt ekki bjóða mér. (ég þurfti reyndar að fara aðeins fyrr úr tímanum en fannst þetta samt alveg ástæða storm-off).

Atburður 3
Eftir að ég fór hneykslaður út úr tímanum settist ég upp í bílinn í þeim tilgangi að endurvekja trú mína á mannkyninu. Af einhverjum ástæðum endaði útvarpið á hinni eiturnettu FM957 þar sem hafsentinn knái úr ÍH var með útvarpsþátt. Lagið Rehab með A. Winehouse hljómaði í útvarpinu en það er lag sem fjallar um konu þar sem vinir og vandamenn hennar eru að segja henni að fara í meðferð en hún er ekki á þeim buxunum og segir bara no no no. Að lagi loknu segir útvarpsmaðurinn eitthvað á þessa leið: “vóóó þetttta er geeeeegggjað lag. En pælið í einu. Það er enginn smááááá kaldhæðni í þessu lagi. Lagið fjallar um að hún eigi að fara í meðferð en hún vill það ekkert, svo ef við skoðum hvað söngkonan heitir þá heitir hún Amy Winehouse eða Amy Vínhús. HAHAHAHA þetta er rooooosaleg kaldhæðni”. Svo kynnti hann næsta lag eða talaði um eitthvað djamm. Það er náttúrulega engan vegin ásættanlegt að láta svona pælingu út úr sér. Umsvifalaust slökkti ég á útvarpinu. Ég veit ekki hvað fær hann til að segja þetta. Kannski er hann búinn að lækka þröskuldinn svona lágt því hann þarf alltaf að vera kynna ný og ný lög og það er kannski erfitt að koma alltaf með eitthvað frumlegt og ferskt aftur og aftur. Kannski verður hann bara að nota þær kynningar sem honum dettur í hug. Ég skil það alveg. Ég geri samt þá kröfu á fólk að hugsa áður en talar, ef því dettur í hug að segja eitthvað svona eins og Amy Vínhús þá á að vera einhver bjalla sem glymur eða rödd sem segir “NEI NEI NEI er ekki í lagi heima hjá þér, auðvitað segirðu þetta ekki upphátt”.

Kannski pæli ég of mikið í þessu og ætti bara að brosa og hlælja. Það er hins vegar eitthvað sem ég geri ekki og mun aldrei gera. Mér finnst samt sem áður Seinfeld og George eiga það inni hjá mér að hneykslast yfir svona hlutum. Þeir hafa endað ástarsambönd, slitið vinskap og brotið lög vegna minni hneykslunaratriða en þessi hér að ofan. Ég veit ekki hvort ég er aulinn í þessu sambandi og Heiðar Austmann og konan sem kom með þessar athugasemdir séu bara geðveikt nett eða vice versa. Ég vil samt halda að ég sé ekki aulinn.

Hann Hörður bróðir minn gaf mér nokkuð flotta myndavél síðustu jól sem hefur komið að góðum notum. Sérstaklega nýttist hún mér vel síðustu helgi þegar ég ákvað að skella mér á Esjuna. Eins og flestir vita sem hafa farið á Esjuna er hún þvílík útivistarparadís og það eru sönn forréttindi að hafa hana svona girnilega við borgarræturnar. Það sem hins vegar færri vita er að ef maður fylgist nógu grannt með á göngunni upp má sjá ýmsa kynlega kvisti. Þessu komst ég svo sannarlega að á göngu minni síðustu helgi. Hér að neðan má sjá nokkrar myndir af ferð minni upp Esjuna.

Gangan reyndist sumum erfiðari en öðrum eins og sjá má á svipbrigðum hennar

Þessi er heimsmeistarinn í að kyssa snáka. Ekki vissi ég að það væri keppt í því

þetta er ekki photo-shop

Ungi með fjórar fætur

Hann hefur örugglega einhvern tíman haft stóra drauma. Kannski ætlaði hann að verða lögfræðingur.

Eru þessi fyrirmæli af gefnu tilefni?

Ánægður með sjálfan sig

Er þetta bara eðlilegt?

Mjá..

Rosalega hefur húðin á honum haldist góð.

Var þetta ekki OFF

Þetta er aldeilis búið að vera skemmtilegt.

bæjó

Það var með vilja gert að hafa ekki Köben beibí í fyrirsögninni því það væri of gegnsætt. En í öðrum fréttum: Á miðvikudaginn er ég að fara til Köben með liðsfélögum mínum og góðvinum úr Leikni R. Þetta er að verða árlegur viðburður hjá okkur. Í fyrra fórum nokkrir eftir keppnistímabilið og í ár gerum við enn betur og förum held ég all flestir úr liðinu, það er reyndar glatað að Gulli og Freysi koma ekki. Leiknir gerist líka svo grand að hlaupa undir bagga með okkur sem erum flest allir fátækir námsmenn. Ferðin í ár verður sérstök að mörgu leyti. Enn eitt að þessum leytum stendur þó verulega upp úr. Það er fráhvarf tveggja máttarstólpa liðsins, þeir Gæi og Haukur. Mér finnst hálf sjoppulegt að kveðja þá á blogginu mínu og mun því ekki gera það. Þeir fá knús og kossa í 1. persónu. Ég elska þá samt báða sem fjölskyldu.

Eitthvað var ég að flakka í my documents og fann þá skjal sem heitir Köben. Í því hef ég punktað niður nokkur skemmtileg atvik úr ferðinni í fyrra. Ég nenni ekki að segja alla sólarsöguna bakvið hvert atriði og því stíla ég meira inn á innanbúðarmarkhóp með áframhaldandi færslu. Vallahh:

1. Mall-ferðin í Magazin með Óla.
Óli ætlaði að draga okkur í einhverja geggjaða verslunarmiðstöð sem hann hafði einu sinni farið í. Galvaskir fórum við á lestarstöðina til að taka lest eða strætó í þetta geggjaða mall sem Óli talaði svo mikið um. Seinna kom svo í ljós að þetta mall var Magazín-búðin á Strikinu sem við höfðum allir farið í daginn áður.

2. Sævar á barnum (samsbar)
Ekkert vera að eyða tíma í að fara á klósettið.

3. I´m gay and I´m loving it
Óli tók eitt kvöld þar sem þemað var samkynhneigð og ég fékk það eftirsóknarverða hlutverk að vera kærastinn hans (bíæts eins og hann kallaði það). Þegar ég var að tala við einhverja dani kom Óli og reif í mig og setti mig fyrir aftan sig og sagði við fólkið: "what is it that you don't understand, I'M GAY AND I'M LOVING IT, stop talking to my boyfriend".

4. Handalaust break
Fer ekki út í það. Hafið bara eitt í huga, ekki taka bylgjuna við stelpu sem er ekki með hendi. Það er frekar vandræðalegt.

5. Fallturninn.
Sumir eru hugrakkari en aðrir. Samt óþarfi að fara að gráta hóst Doddi hóst.

6. Hjólaferð
Born to be wild hljómaði í eyrum okkar allra þegar við fórum í eftirminnilegan og manndómsgerandi hjólatúr eina nóttina. Hann var eflaust Topp 10 einstakir atburðir sem ég hef gert.

7. We buy people like you and blow them up
Buxmann að reyna útskýra áramótin hjá okkur fyrir Asíubúum.

8. CPR-dansinn.
Við fundum upp marga góða dansa. Eitt kvöldið fórum við að dansa á staðnum við hliðina á Vega. Ég og Óli vorum búnir að fíflast í svona hálftíma á gólfinu (sem okkur fannst eiga að vera dansgólf). Að þessum hálftíma loknum ákváðum við að taka pásu og hleypa minni spámönnum að. Sævar sá sér leik á borði og stökk út á dansgólfið og eftir svona 30 sec dansmúf var honum vinsamlegast tilkynnt af starfsfólki staðarins að þetta væri hvorki staður né stund til að dansa. Hann var beðinn um að versla eitthvað hjá þeim og setjast í sætið sitt eða fara út.

9. If there's any calls, just take á message.
Ási er kóngur hvar sem hann fer.

10. Amazing Race
Við fórum í Amazing Race leik um Köben skipulagðan af vini hans Hauks. Eins og þið getið rétt ýmindað ykkur þá var það frábært.

11. Betlað á strikinu.
Í svona stórum og fleppuðum hópi er mjög auðvelt að mana menn í að rífa síg úr að ofan og betla á strikinu.

12. Kjarri að múna í Nyhavn
Í svona stórum og fleppuðum hóp er hægt að fá Kjarra til að gera allt. Verst hvað hann er orðinn vippaður. En hann fær tækifæri til að hrista mjúka stimpilinn af sér úti.

13. Ég þarf greinilega að kynnast stelpunni first.
Þetta sagði við mig bugaður félagi sem gekk ekkert að veiða.

14. Mamma hans Óla er gay-eyey
Við erum svo sniðugur að breyta textum í lögum tíhí.

Jæja það er vika í hamingjuna. Ekki spurning að það sé kominn mikill fiðringur í mann.

Röltandi niður minningarbrekku,
Pétur Örn Svansson

Ein aðalástæðan fyrir því að þættirnir um grínistann Seinfeld og skrýtnu vini hans, George, Elaine og Kramer eru svona langlífir og viðurkenndir er að það er hægt að horfa á þá í svo mörgum víddum. Það er hægt að horfa á þættina aftur og aftur því þættirnir eru svo djúpir og mikilfenglegir. Við fyrsta áhorf hlær maður að öllum augljósu djókunum og þeim sniðugu uppákomum sem þættirnir hafa upp á að bjóða. Næst fer áhorfandinn að pæla í snilldarhönnun persónanna í þáttunum og hinir allra hugrökkustu velja sér uppáhalds karakter. Svo fer maður að pæla í undirliggjandi snilligáfu þáttanna í að stúdera mannlegt atferli. Svona halda Seinfeld þættirnir alltaf áfram að koma áhorfandanum á óvart. Þættirnir bjóða upp á svo mikið. Burt séð frá húmornum og pælingunum, finnst mér mjög fyndið að kærustur Seinfeld (og yfirleitt George) líta flestar út sem fyrirsætur. Þó flestar þessarra snoppufríðu leikkvenna komu og fóru án þess að láta fara mikið fyrir sér þá hef ég tekið eftir því að nokkrar þeirra eru frægar í dag. Mig langar að taka saman svona þær sem ég man eftir, ekki í neinni sérstakri röð.

Kristin Davis. þó að Kristin Davis hafi verið í Melrose Place í smástund þá var hún samt ekkert orðinn það fræg þegar hún kom fram í Seinfeld sem Jenna í þáttunum The Pothole og smá í The Butter Shave. Stuttu eftir þetta fór hún að leika Charlotte í Sex and the city.

Catherina Keener. Hún var rétt að byrja þegar hún lék kærustu Seinfeld, abrýðissama málarann Ninu í þættinum The Letter. Síðan þá hefur hún slegið í gegn í myndum á borð við: Boys, Out of sight, 8MM, Being John Malkovich (óskarstilnefning), S1m0ne, 40 year old virgin og núna síðast í Capote, sem hún fékk óskarsverðlaunatilnefningu fyrir.

Jane Leeves. Flestir ættu að kannast við hana sem Daphne úr Fraiser. Áður en hún lék í Fraiser lék hún hins vegar jómfrúnna Mörlu í þáttunum The Virgin og The Contest.

Debra Messing. Hún var ekkert sérstaklega fræg þegar hún fékk hlutverk Beth í þáttunum The Wait Out og svo ári síðar í The Yadda yadda. Frægust er hún samt fyrir hlutverk sitt sem hommavinurinn Grace í þáttunum Will og Grace.

Lauren Graham. Hún lék Valerie í The Millenium. Hún er samt eflaust þekktari fyrir að leika Lorelai Gilmore í Gilmore Girls.

Melinda Clarke. Úhh beibí. Hún er rosaleg í The O.C. sem Julie Cooper-Nichol og slagar vel í topp 5 Milf listann. En eins og svo margar aðrar hefur hún líka leikið kærustu Seinfeld. Það gerði hún í þættinum The Muffin Tops og svaraði nafninu Alex.

Lori Loughlin. Hún er ekkert rosalega fræg en hefur leikið í mörgum þáttum. Til dæmis má nefna Spin City, The Drew Carey Show, Jake in progress og Full House. Hún kom við sögu í Seinfeld þegar hún lék Patty í Serenity Now.

Teri Hatcher sker sig úr á þessum lista vegna þess að hún er eina konan hérna sem ég hef hitt í eigin persónu, já já ég lenti einu sinni á spjalli við hana þegar hún kom til Íslands.. nóg um það. Teri þarf vart að kynna en hún hefur leikið víða t.d. í Love Boat, Lois & Clark og nú síðast í Desperate Housewifes. Teri lék kærustu Seinfeld, hana Sidru, í þættinum The Implant.

Marcia Cross. Hún leikur með vinkonu minni í Desperate Housewifes. Einnig hefur hún leikið í Melrose Place og eflaust einhverju meira. Í Seinfeld lék hún Dr. Sarah í The Slicer.

Jennifer Coolidge. Hún er eflaust frægust fyrir að leika mömmu hans Stifler í American Pie og starta hinum víðfarna og hjálpsama orðaleik: MILF. Einnig hefur hún leikið í bíómyndum eins og Legally blonde og  Night at the Roxbury. Hún lék kærustu Seinfeld sem var nuddari en vildi ekki nudda Seinfeld í þættinum The Massause.

Jami Gertz. Maður hefur nú alveg séð þær frægari, ég viðurkenni það. Hún Jami leikur í þáttunum Still Standing ásamt feita gaurnum úr The Full Monty. Í Seinfeld lék hún Jane í The Stall.

Marlee Matlin. Hún lék í Seinfeld þættinum The Lip Reader. Þar lék hún Laura sem var heyrnalaus tennisboltasækir og gat lesið varir. Að sjálfsögðu þufti George að nota hana til að lesa varir fyrrverandi kærustu sinnar. Marlee Maltin hefur leikið í helling af þáttum og bíómyndum. Rjóminn af því er Spin City, ER, Judging Amy (ekki beint rjómi), The Practice, Desperate Housewifes, Law and order og The West Wing.

Christine Taylor. Hún er konan hans Ben Stillers og hefur leikið í mörgum góðum þáttum og bíómyndum. Dæmi: Ellen, Murphy Brown, Friends, The Brady Brunch Movie, Spin City, Zoolander, Dodgeball, Arrested Development og My name is Earl. Í Seinfeld lék hún Ellen í þættinum The Van Buren Boys. Ekki slæmt að hafa leikið í Seinfeld, Arrested development og Friends.

Janeane Garofalo. Hún er svona borderline gellu leikkona og leikur yfirleitt konu sem er sæt og sjarmerandi en samt með útlitsissjúss. Hún hefur leikið í mjög miklu. Ef þig langar að sjá meira af henni getur þú horft á The Truth about Cats and Dogs eða Seinfeld þættina The Foundation og The Invitations en þar leikur hún Jeannie.

Courteney Cox. Hana þarf varla að kynna en hún er ein vinanna í Friends. Einnig var hún mjög góð í Ace Ventura. Í Seinfeld lék hún Meryl í The Wife.

Amanda Peet. Hún lék Linette í  Seinfeld þættinum Summer of Goerge. Fyrir utan það hefur hún leikið í The Whole Nine Yards, Identity, Melinda and Melinda, A lot like love og  Syriana.

Þessi listi er eflaust ekki tæmandi en ég tel mig samt fara langt með það. Fróðir menn eru hvattir til að koma með ábendingar um fleiri spúsur. Ég nenni samt ekki að fá komment um að tæknilega séð hafi þessi ekki verið kærasta Seinfeld og eitthvað þannig nördatal. Mér fannst samt mjög gaman og um leið fróðlegt að rifja þetta upp.

Live well and prosper.